今晚自己搭地鐵過九龍嗰邊食飯，上到車見到有個空位諗住行埋去，點知隻右手忽然俾人拉住咗兼扯向前令我失平衡舂一舂爭啲跌。轉頭一望係個伯伯，佢好着緊咁話：「你坐呀，快啲去坐個位啦！」
落咗車一片人山人海，喺我小心翼翼行緊去扶手電梯嘅時候，忽然感覺左邊腋下俾人好大力咁稱住咗。轉頭一望原來係個姨姨，佢係咁叫我「小心啲呀」再將我扶上電梯，上到去之後佢仲要好好心咁問我邊個出口，扶到我出站先行返回頭。
係，成件事係好warm...我都feel到香港真係個好有人情味嘅地方，所以雖然未完全行得穩，跌倒亦爬唔返起身，我都好放心一個人搭地鐵周圍去。但我想講呢，一般人真係唔使見到有人行動不便就走去扶佢哋，因為咁樣可能會仲危險。我都明傷殘人士行路個款真係好恐怖，好似飲醉酒咁橫衝直撞，不過我哋其實係有自己嘅一套行路方法，例如我行路嘅時候雙手會搖來搖去，如果有人捉實咗我，我反而係會控制唔到啲手腳，結果仲容易因為無法平衡而仆街。
所以下次喺街見到行路姿勢奇怪嘅人，真係唔需要特別去扶佢哋㗎，或者可以係出手相助之前問一問先，扶都有好多方法㗎嘛！問一問我哋需要乜嘢幫助，就可以確保唔會好心做壞事，亦唔至於浪費咗自己嘅一番好意。其實最簡單又肯定可以幫到行動不便嘅人嘅方法係：盡量留返多少少空間俾我哋活動，同埋行喺我哋後面嘅人可以放慢腳步，避免我哋行得太慢而被踢倒，咁就已經好好同實幫到手㗎喇。😚
#幫手share出去俾多啲人睇到呀唔該
Search